திருவாளர் அபிஷேக் பச்சன், திருமதி ஐஸ்வர்யா ராய் திருமணத்தில் நிகழ்ந்த சடங்கு

அன்பு சகோதரர் இறைநேசன் அவர்கள் என்னை எழில் அண்ணாச்சி என்று அன்புடன் அழைத்து திருவாளர் அபிஷேக் பச்சன், திருமதி ஐஸ்வர்யா ராய் ஆகியோரின் திருமணத்தில் நடந்த சில சடங்குகளைப் பற்றி நான் ஏதும் கருத்து கூறவில்லையே என்று கேட்டிருக்கிறார்.

ஒவ்வொரு சமூகத்திலும் ஒவ்வொரு சடங்குகள், ஒவ்வொரு பழக்கங்கள், ஒவ்வொரு நிவர்த்தி கடன்கள் இருக்கின்றன. இவை அந்தந்த சமூகங்களின் நல்லெண்ணத்தின் பிரதிபலிப்பாகவும், திருமண தம்பதியினர் நல்வாழ்வு வாழ வேண்டும் என்ற எண்ணத்திலும் உருவாகியிருக்கின்றன.

நல்லெண்ணத்தில் உருவாக்கபப்ட்ட இப்படிப்பட்ட கருத்துக்கள் சில வேளைகளில் தடங்கல்களாகவும் ஆகிவிடுகின்றன. ஜோதிடத்திலும் அது குறிப்பிடும் பலன்களிலும் அது குறிப்பிடும் நிவர்த்திகடன்களிலும் எனக்கு பரிச்சயம் கிடையாது. இப்படிப்பட்ட நம்பிக்கைகள் எல்லா சமூகங்களிலும் இருக்கின்றன. மசூதிகளில் ஊதினால் குணம் அடைந்துவிடும் என்று நம்புபவர்களும், சுவிசேச கூட்டங்களில் தலையை தட்டினால் குணம் அடைந்துவிடும் என்று நம்புபவர்களும் இருக்கிறார்கள். அது அவரவர் நம்பிக்கை. அந்த நம்பிக்கை மற்றவர்களை பாதிக்காமல் இருக்கும் வரைக்கும் நாமும் அதனை கேவலப்படுத்த வேண்டாமே.

உதாரணமாக நீங்கள் ஜாதி வித்தியாசத்தால் துயரப்படும் இந்தியர்களை பற்றி எழுதுவது மிகச்சரியானது. அது உங்கள் நம்பிக்கையை தாண்டி மற்றவர்களை துயரப்படுத்துகிறது. அதனை கண்டிக்கவேண்டியது நியாயமானது.

உங்கள் நம்பிக்கை மற்றவர்களது உரிமைகளையும், மற்றவர்களது உயிரையும், மற்றவர்களது உடைமைகளையும் பறிக்கும்போது, நீங்களும் அவற்றை பற்றி எழுதுங்கள்.

மிக்க நன்றி சகோதரரே.