50 வயது பெண்ணை நிர்வாணமாக ஊர்வலம் போக வைக்க ஊக்குவித்த இமாம்

’پیش امام بھی اکساتے رہے‘

شہزاد ملک
بی بی سی اردو ڈاٹ کام، نیلور بالا، ہری پور

مقامی پولیس کا کہنا ہے کہ نیلور بالا گاؤں کی رہائشی پچاس سالہ خاتون شہناز بی بی کو برہنہ کرتے وقت مقامی مسجد کے پیش امام بھی اُن لوگوں میں شامل تھے جنہوں نے اس خاتون کی عزت کو پامال ہوتے ہوئے دیکھا۔

متعلقہ تھانے کے انچارج کے بقول پولیس کو ایسے شواہد ملے ہیں جس میں گاؤں کے امام مسجد سخاوت حسین نے اس مقدمے میں ملوث افراد کو اُس وقت اُکسایا جب وہ شہناز بی بی کے چھوٹے بیٹے کے گھر میں توڑ پھوڑ کے علاوہ گھریلو سامان کو آگ لگانے کے لیے جارہے تھے۔

پولیس کا کہنا ہے کہ اس واقعہ کی تحقیقات کی جارہی ہیں اور جوں جوں تفتیش میں پیش رفت ہوگی تو اس میں ملوث مذکورہ امام مسجد سمیت مزید افراد کو گرفتار کیا جائے گا۔

اس مقدمے میں اب تک دو افراد محمد رقیب اور مطلوب حسین کو گرفتار کیا گیا ہے جو اُس پنچایت میں شامل تھے جس میں شہناز بی بی کے بیٹے کے ملزم سلمان کی بیوی کے ساتھ مبینہ طور پر ناجائز تعلقات کے معاملہ اُٹھایا گیا تھا اور اس پنچایت میں سلمان نے اپنی بیوی کو طلاق دے دی تھی۔

ملزم سلمان اور اُس کے ساتھیوں نے شہناز بی بی کے بیٹے سے بدلہ لینے کے لیے دھاوا بول دیا تھا تاہم وہ گھر پر موجود نہیں تھا جس پر ملزمان نے اُس کی والدہ شہناز بی بی کو برہنہ کرنے کے بعد زد وکوب کیا۔

شہناز بی بی کے سُسر دلاور خان کا کہنا ہے کہ پنچایت کے فیصلے کے برعکس ملزمان نے اُس کی بہو نہ صرف بےحرمتی کی بلکہ وہ ملزمان کی منتیں بھی کرتے رہے لیکن اُنہوں نے ایسا نہیں کیا۔

اُنہوں نے کہا کہ مسجد کے پیش امام بھی اُن افراد میں شامل تھے جو خاموش تماشائی بنے رہے اور اُنہوں نے ملزمان کو یہ تک نہیں کہا کہ یہ اسلام کے خلاف ہے۔

مسجد کے پیش امام سخاوت حسین سے جب یہ پوچھا گیا کہ اُنہوں نے ملزمان کو کیوں نہیں روکا تو اُن کا کہنا تھا کہ تمام افراد مسلح تھے اور کسی کو بھی اگے آنے کی اجازت نہیں تھی۔ اُنہوں نے مقامی پولیس کو اطلاع نہ دینے پر اپنی غلطی تسلیم کیا۔

اس پنچایت میں شامل ایک اور شخص عمر دراز کا کہنا تھا کہ اُس پنچایت میں پچیس افراد شامل تھے لیکن اس واقعہ کے بعد صرف چار افراد گاؤں میں موجود ہیں جو اُس پنچایت میں موجود تھے جبکہ باقی افراد ابھی تک روپوش ہیں۔

پنچایت کے فیصلے کے برعکس مبینہ طور پر تشدد کا نشانہ بننے اور برہنہ کی جانے والی پچاس سالہ خاتون شہناز بی بی نے مقامی مجسٹریٹ کے سامنے بیان دیا ہے کہ اُسے چار ملزمان نے اسلحہ کی نوک پر زبردستی برہنہ کرنے کے بعد تشدد کا نشانہ بنایا ہے۔ اس کے علاوہ تین افراد نے ان افراد کو اُکسایا جن میں علاقے کا ایک بااثر آدمی محمد بشیر بھی شامل ہے۔

ڈی آئی جی ایبٹ آباد رینج ڈاکٹر محمد نعیم کا کہنا تھا کہ یہ وقوعہ سات جون کو پیش آیا تھا لیکن کسی نے بھی اس واقعہ کی رپورٹ متتلقہ تھانے میں درج نہیں کروائی جس کے بعد متعلقہ تھانے کے انچارج نے خود مدعی بنکر مقدمہ درج کیا۔ بی بی سی سے گفتگو کرتے ہوئے اُنہوں نے کہا کہ چونکہ شہناز بی بی نے عدالت میں بیان دے دیا ہے اس کے بعد اب وہ اس مقدمے میں مدعی بن جائیں۔